મારા બાલુડા ગોપાલ

મારા બાલુડા ગોપાલ! રમવા આવો તો તમને દલુડો દઉં
દલુડો દઉં રે, તમને દલુડો દઉં રે - મારા

નાના નાના દલુડા ને મોતીડાની ભાત,
તમને રમાડવાની મુજને ઘણી ખાંત - મારા

મોતી કેરા ઝુમખા ને કેસર કેરી ગાંઠ
તમારે કાજે રે મેં તો ઘર માં કીધો ઠાઠ - મારા

આમને સામને દોડવશું ને કરશું ઝાઝા ખેલ
વેણી ગૂંથુ ફૂલતણી ને તેલ ઘણાં ફૂલેલ - મારા

તિલક કરીને અંજન આંજું, રડશો ના અલબેલા
ભોજનિયાં બહુ ભાતભાત ના, તમને પીરસું પહેલા - મારા

શિંકે રાખ્યા માખણ મિસરી, પટ વસ્ત્ર થી ઢાંકી
મોદક કીધા માવા કેરા ઝાઝી સાકાર નાખી - મારા

ઝાંઝરીયા પહેરાવું તમને, ઠમકે ઠમકે નાચો
હું તમારા રંગમાં રાચું, તમે મારે રંગે રાચો - મારા

ભાત ભાત ના રમકડાં ને વૃક્ષે ઝૂલો બાંધું
પ્રેમ ધરીને તેડી તમને પારણિયે પોઢાડું - મારા

હાલરડાં હું ગાઇ સુણાવુ કુમુદિની ના ચંદ
હસતા હસતા ખોળે બેઠા, પામ્યા આનંદ - મારા