કાળા કાળા ચોરની મોહિની

કાળા કાળા ચોરની મોહિની લાગી રે,
શ્યામ સુંદર રૂપની મોહિની લાગી રે,
જગતના એ ભૂપની મોહિની લાગી રે,

દૂર મેવાડ દેશ ચિત્ત ચોર વસે રે,
નીરખી નીરખી જેનું મારું મનડું હશે રે,
ચિતડાના એ ચોરની મોહિની લાગી રે - કાળા કાળા ચોર

સંસારની આ માયા જોય હું તો થાકી રે,
સાંભળને ઓ શામળા મારી પિરતડી પાકી રે,
મનડાના એ મોરની મોહિની લાગી રે - કાળા કાળા ચોર

સ્મરણ તારી છબી કેરું મુજને વહાલું રે,
કૃષ્ણના નામ આધારે હું જગમાં મ્હાલું રે,
વાંસળી ઘનઘોર જોને એવી લાગી રે - કાળા કાળા ચોર

દર્શન એના કરી હું તો ભાન ભૂલી રે,
મીઠડી ઝાખી પર 'નીતા' જીવન વારી રે,
માખણના એ ચોરની મોહિની લાગી રે - કાળા કાળા ચોર