છેલડા હો છેલડા

છેલડા હો છેલડા, માખણના ઘેલડા,
રાધાજીના જીવન પ્રાણ - છેલડા હો

આવો અલબેલડા, ઘરમાં એકલડા,
ન આવો તો નંદજીની આણ - છેલડા હો

ઓઢી મેં ઘાટડીને જોઉં છુ તારી વાટડી,
શ્યામ સલુણા સુજાણ - છેલડા હો

હળવેથી આવજોને સાંકળ ખખડાવજો,
જો જો ન થાયે જાણ - છેલડા હો

સાસુ કઠોર છે, નણંદી ચકોર છે,
એતો કરી મુકશે બુમરાણ - છેલડા હો

ઉરના આસન પર, પઘરાવું નટવર,
સેવું ચરણ સુખ આણ - છેલડા હો

માખણ ને મીસરી, આરોગાવું શ્રી હરિ,
‘ગોવિંદ'ના ભાગ્ય તણો પાર - છેલડા હો