અતિ રે આનંદ ભર્યા

અતિ રે આનંદ ભર્યા આવો મારે અંગે,
શ્યામ સુંદર વર શોભો છો સંગે - ૧

મુખડુ જોયા વિના પાણીડાં ન પીઉં,
રસિક સુંદર વર જોઈ જોઈ જીવું - ર

રસિક સુંદર વર શી રઢ લાગી,
જનમો જનમની મારી ભાવટ ભાંગી - ૩

સગપણ તો શામળીયાનું સાચુ,
બાકી સર્વે દીસે છે કાચું - ૪

મુજને ન વારો મારી રે માડી,
દર્શન કરવાને જઈશ દોડી દોડી - ૫

કહેશે રે તેને કહેવા રે દઈશું,
આપણે સર્વે સાંભળી લઈશું - ૬

નંદના કુંવર તમે ન કરો વડાઈ,
મોટા થયા મારા માખણ ખાઈ - ૭

નંદના કુંવર તમે બહુ રંગ રસિયા,
અમારે કારણ વાલો વ્રજમાં વસીયા - ૮

અતિરે આનંઘ્ભર્યા નંદ ધેર જઈશું,
દર્શન કરીને સુખીયા રે થઈશું - ૯

ઘણા રે દિવસના વાયદા રે વળીયા
શ્રીવલ્લભ પ્રભુ શ્રીગોવર્ધન મળીયા - ૧૦

અતિ રે આનંદ ભર્યા આવો મારે અંગે,
શ્યામ સુંદર વર શોભો છો સંગે